اعلامیه حزب حکمتیست درباره پیام “آشتی” اوجالان و آتش بس پ.ک.ک/ به زبانهای فارسی و کردی

پەیامی عەبدوڵا ئۆجالان لە زیندانی ئیمرالی تورکیە و قبوڵکردنی لەلایەن ڕێکخراوی پەکەکەوە، ڕەنگدانەوەی بەرفراوانی لە ڕای گشتی و لە کەشوهەوای سیاسی ناوچەکەدا پێکهێناوە. ئەم پەیامە دەرئەنجامی چەند ساڵ گفتوگۆی نێوان بەرپرسانی حکومەتی تورکیا و عەبدوڵڵا ئۆجالانە لە زینداندا کە زۆرینەی بە نهێنی و بەشێکی ئاشکرا ڕویداوە.

ئەم پڕۆسەی ئێستا دوای بانگەوازی “دەوڵەت باغچەلی” بەرەی ڕاست و فاشیست و توندڕەوی پێکهاتەی دەسەڵاتداری تورکیا، کە ئاراستەی ئۆجەلان و پەکەکەی کردبوو بۆ دەستپێکردنی پڕۆسەی چەکداماڵین و سازان لە نێوان لایەنەکاندا. گومانی تێدا نییە کە هەوڵەی ئێستا و ئەو کارانەى تا ئێستا لە لایەن هەردوولا و بە تایبەت حکومەتى تورکیاوە ئەنجامدراون، کاریگەریى پێشهاتە گەورەکانى جیهان و ناوچەکەیان لەسەرە.

پلانی دووبارە داڕشتنەوەی نەخشەی کۆنەپەرەستانی “ڕۆژهەڵاتی ناوەڕاستی نوێ” بە پلانگێڕی ئەمریکا و دەوڵەتی فاشیستی ئیسرائیل. جێگە و ڕێگەی هەریەک لە حکومەتەکانی ئەم هەرێمە و لەوانە تورکیە گۆڕانکاری بەسەردا دێت و هەموولاێک هەوڵی خۆگونجاندن لەگەڵ بارودۆخە تازەکە دەدەن. لەم پێوەندییەدا حکومەتی تورکیا نیگەرانە لەوەی حکومەتی ئیسرائیل و هاوپەیمانەکانی “کارتی پرسی کورد” بۆ لاوازکردنی پێگەی خۆی کەڵک لێوەرگرن. بۆیە بە ئامانجی ناکاراکردن ئەم پرسە لە کوردستانی تورکیا و تەنانەت کوردستانی سوریاش، بە ڕووکردنە ئۆجالان و پێدانی چەند ئیمتیازێک ئەگەر ناچار بکرێن، بە دوای سازان لەگەڵ پەکەکە دەگەڕێن. لە لایەکی دیکەوە، شکستی میحوەری مقاومەت کە پەکەکە پشتی پێبەستووە و بنبەستی بزووتنەوەی چالاکی چەکداری لە بۆشایی نێوان دەوڵەتەکان و ناکامی سووڕی بێکۆتایی “شەڕ-دانوستاندن-شەڕ”، پەکەکەیان خستۆتە سەر ڕێگای سازان لەگەڵ حکومەتی تورکیا و گۆڕانکارییەکی بنەڕەتی لە چالاکییە سیاسییەکانیدا. پەیامەکەی ئۆجەلان هەوڵێکە بۆ دەرهێنانی پەکەکە لەم دۆخە و هەر لەبەر ئەم هۆکارەش لەلایەن سەرکردایەتی ئەم ڕەوتەوە پێشوازی لێکرا.

بانگەوازەکەی ئۆجەلان، لە هاوسەنگییەکی زۆر نالەبار و پڕ لە کۆت و بەند، ڕێکارێکە بۆ لایەنی دەسەڵاتداری سەرکوتگەری تورکیا، دوای دانانی چەک و هەڵوەشاندنەوەی پەکەکە، دۆخێک بڕەخسێننن بۆ بەشداریکردن ئەندامانی پ.ک.ک لە میتابۆلیزمی سیاسی کۆمەڵگەی تورکیا بە فۆرماتێکی تر و گەڕانەوەیان بۆ ژیانی ئاسایی و مەدەنی. ئەم سیاسەتە لە ملکەچبوونەوە نەهاتوە، بەڵکو لەگەڵ ئاسۆی سیاسی و تێڕوانینی جێکەوتوی ئۆجالان و پەکەکە سەبارەت بە “کۆنفیدرالیزمی دیموکراسی” و “کۆمەڵگە دیموکراتییەکان” و بڕوای ئۆجەلان بە بەشداریکردن لە پرۆسەکانی “دیموکراتیزەکردنی” کۆمەڵگەی تورکیا و بوون بە پارتێکی سیاسی پەرلەمانی یەکدەگرێتەوە. ئەم هەنگاوە سیاسیەش هاوتەریبە لەگەڵ ئامانجی سیاسی ناسراوی بزووتنەوەکانی ناسیۆنالیزمی بۆرژوازی کورد، واتە هاوبەشکردنی دەسەڵاتی سیاسی لەگەڵ بۆرژوازی باڵادەست لە ناوەنددا لەژێر بەرگی فریودەرانەی “بەدەستهێنانی مافە نەتەوەییەکانی کورد”. هەمان ئەو چوارچێوەیەی کە ئێستا “دم پارتی” نزیک لە پەکەکە تێیدا کاردەکات.

ئەزمونی چوار دەیە شەڕ و ڕووبەڕووبوونەوەی هێزە نیزامییەکانی حکوومەتی تورکیا و هێزە چەکدارەکانی پەکەکە، ئەم واقیعە چینایەتی و سیاسییە دووپات دەکاتەوە کە شەڕی بزووتنەوەی ناسیۆنالیستی کورد و حکوومەت لەگەڵ بەرژەوەندیی کرێکاران و خەڵکی زەحمەتکێش ناگونجێت. بێگومان سەرهەڵدانی کێشەی نەتەوەیی کورد کە لە کوردستانی تورکیادا، ڕاستەوخۆ دەرئەنجامی چەوساندنەوەی ناسیۆنالیزم و شۆڤێنیزمی دەسەڵاتداری تورکییەیە لە سەد ساڵی ڕابردوودا. سەرکوتی دڕندانە و فاشیستانەی سوپا و هێزە سەربازییەکانی حکومەت لە دژی خەڵکی کوردستان و پەکەکە، بووەتە هۆی نائەمنی گشتی و پەرەسەندنی کەشوهەوای شەڕ لەلایەن حکومەتی تورکیا و بەرتەسککردنەوەی مەیدان بۆ ژیانی ئاسایی هاوڵاتیانی کۆمەڵگا. پرۆسەی دانوستانەکانی پێشوو و چەندین ڕاگەیاندنی ئاگربەست لەلایەن پەکەکە هەرجارە لەلایەن حکومەتی شۆڤێنی تورکیەوە پێشێلکرا.

ئەمجارەش گومانی جددی هەیە کە حکومەتی تورکیا تەسلیمی سازش بێت. بەم وەسفە دەکرێ سازشکردنی ئەگەری نێوان حکومەتی تورکیا و پەکەکە بە هەنگاوێک بۆ پێشەوە هەژمار بکرێت بە ئاراستەی کەمکردنەوەی ئەو ئازارانەی کە بەهۆی ستەمکاریی لەمێژینەدا دروست بووە و دەرئەنجامە زیانبەخشەکانی ئەم ململانێیانە لەسەر شانی خەڵک، ئەگەر هەر لە سەرەتای پرۆسەکەدا ئەم ئەنجامانەی خوارەوەی لێبکەوێتەوە:

1- پێویستە، باری نائاسایی و میلیتاریزمی سەپێنراو بەسەر گوزەران و ژیانی خەڵک لە کوردستانی تورکیا دەستبەجێ کۆتایی پێبهێنرێت.

2- سەرجەم زیندانیانی سیاسی بە عەبدوڵا ئۆجەلانیشەوە ئازاد بکرێن.

3- بۆ کۆتایی هێنان بە ستەمی نەتەوەیی و چارەسەرکردنی دۆزی کورد، دەبێت بگەڕینەوە بۆ ڕای گشتیی خەڵکی کوردستانی تورکیا. پێویستە ئەوە ڕابگەیەنرێت کە خەڵکی ناوچە کوردنشینەکانی تورکیە لە هەموو ئاست و لایەنەکانی ژیانی کۆمەڵگا لە سەرجەم بوارە کۆمەڵایەتی و سیاسیەکاندا خاوەن مافێکی یەکسانن. ئەم مافە سەرەتاییەی خەڵک لە دەستووری بنەڕەتی ئەو وڵاتەدا بە ڕوونی باس بکرێت و جێبەجێ بکرێت.

4- دابینکردن و گەرەنتی ئاسایش و دەرفەتی چالاکی سیاسی ئازادانە بۆ ئەندامانی پ.ک.ک.

ڕوونە کە لابردنی ستەمی نەتەوەیی و چارەسەرکردنی کێشەی نەتەوەیی لە تورکیە هەنگاوێکە بۆ پێشەوە. بەڵام هێشتا نە خەڵک و نە کرێکارانی کورد زمان “ئازاد” نابن و یەکسەر خۆیان لەبەردەم بۆرژوازی “ناوخۆ”دا دەبیننەوە. حوکمڕانی حکوومەتی هەرێمی کوردستانی عێراق و ئەو نادادپەروەرییانەی لە ماوەی زیاتر لە سێ دەیەی ڕابردوودا بەسەر کرێکاران و ژنان و خەڵکی کوردستانی عێراقدا سەپێندراون، ئەزموونی زیندووی دەسەڵاتی “بۆرژوازی کورد”ن. بەم وەسفە، لە ڕوانگەی چینی کرێکار و خەڵکی بێبەش و کۆمۆنیستەکانەوە، دەستپێکردن و کرانەوەی ژینگەی سیاسی و کۆمەڵایەتی دوور لە ستەم و زیندان و شەڕی ئێستای کوردستانی تورکیا و داننان بە مافی هاوڵاتیبوونی یەکسان بۆ هەموو هاوەڵاتیان بە کوردیشەوە لە تورکیا، بەبێ گوێدانە نەتەوە و ئایین و زمانیان، هەنگاوێک دەبێت بە ئاراستەی پێشکەوتنی کۆمەڵگا و بەرەوپێشچوونی ململانێی چینایەتی ئێستا و داواکارییە سیاسییەکانی چینی کرێکار. ئەگەر ئەم جۆرە دەرەنجامانە بەدی بهێنرێت، هەلومەرجی گونجاوتر بۆ بەرپەرچدانەوەی ژەهری ناسیۆنالیستی لە ڕیزەکانی چینی کرێکاری تورکیادا، چ لە ناوچە کوردستانیەکان و چ لە باقی وڵاتدا، بۆ پێشخستنی هاوپشتی کرێکاری و چینایەتی لە سەرتاسەری تورکیەدا دروست دەبێت. دەرفەتێک بۆ کۆمۆنیزمی چینی کرێکار دێتە پێشەوە کە وەک یەک چین بزوتنەوەی جیاوازی خۆی لە دژی بۆرژوازی بە هەموو جۆرەکانیەوە پێکبهێنێت. بە پتەوکردنی بناغەی بزووتنەوەی چینایەتی خۆی، بە گەشەکردن و سەرکەوتنی خۆی، ڕزگاری یەکلاکەرەوەی مرۆڤ و کۆمەڵگەیەکی ئازاد و یەکسان و دوور لە هەر جۆرە چەوساندنەوە و هەڵاواردنێک بەدەست دەهێنێت. گەرەنتی ڕاستەقینەی ئەم ئەرکە گرنگییە پەیوەستە بە سەرهەڵدانی کۆمۆنیزم و چینی کرێکاری یەکگرتوو و خۆئاگا و دامەزراندنی سیستەمێک کە دور لە جیاکاری نەتەوەیی و ئایینی. ئازادیی خەڵک و کرێکاران لە سەرتاسەری تورکیەدا بەندە بە شۆڕشی کرێکاری دژ بە دۆخی ئێستا و دامەزراندنی سۆسیالیزم.

حیزبی کۆمۆنیستی کرێکاری ئێران – حیکمەتیست

٥ی مارسی ٢٠٢٥